Luk 17 | TPZ | STEP | E Ieesuß to soe ke a ma vamomhë peß, “A ma vu taateß hat se tavus maß, ko miröß o kokoman pa ma napan, kee kuß ee pa taateß hat. Ivëhkëk, varenan rakah pa teß to rëh a meh teß pa nok a hat.

Luke 17

A Taateß Hat To Mimiröß Non Sih O Vaman Pa Teß

Matiu 18:6-7; 18:21-22, me Mak 9:42

1 E Ieesuß to soe ke a ma vamomhë peß, “A ma vu taateß hat se tavus maß, ko miröß o kokoman pa ma napan, kee kuß ee pa taateß hat. Ivëhkëk, varenan rakah pa teß to rëh a meh teß pa nok a hat. 2 Eß to vih rakah non pa ö nöm se vahan a vös apuh pa koßkoneah ko varu eah tahiß, eß he meß e non pa rëh ke o vaman pa siß koaß soneß, keß kuß manih pa taateß hat.”

3 Ivëh, ke eöm se matop koman hah a nem tomeß eöm rëh ta meh teß pa nok a hat.

E kea pën se keh nok a hat manih pën, eën se soe keah, keß panih a taateß hat peß, kën se ihan anoe këh eah a hat peß. 4 Ke kea pën se keh nok a hat manih pën pa tönim me a poa tëëm koman a pah potan, pareß hah maß pën, ko soe vatamak ka oah pa tönim me a poa tëëm koman a pah potan, a, eën se ihan anoe këh eah a hat peß.”

E Ieesuß To Sosoe Suk Non A Taateß Va Po Vaman

5 Ka ma aposol soe ke Apuh pan, “Eën se nok vaßpuh o vaman pemöm keß apuh rakah maß.” 6 Ke Apuh soe ke raoe pan, “O vaman peöm se keh teß va non manih po voaß naon soneß vëh o voaß mastat, eöm se taß o meoh naon apuh vëh pan, ‘Tatai ah, parën nö, ko pu hah manuh tahiß.’ Eß se suk en pa soe peöm.”

E Ieesuß To Sosoe Suk Non A Taateß Pa Teß Kikiu

7 “Ta pah teß manih peöm, se keh teß me non a teß kikiu to eneen non sih o oeh manuh pa rak, keß to matop non o sipsip. Vasuksuk neß to hah en maß iuun, ke susun peß soe pöß ke poan pan, ‘Vëvëhöß ho poß maß parën ihoß ko ëën.’ Eß hikta se taß non poan pa ihoß ko ëën. 8 Ahik, e susun se soe ke poan pan, ‘Eën se vamatop a taëën peöß, parën voh o voh, ko hak a taëën peöß parën teß maß. Eöß se ëën, paröß kaak vovoh, ko vasuksuk poß nën se ëën ko kaak.’ 9 Ke susun se pöß soe vavihvih ken pa teß kikiu vëh to vatet a soe peß. Eß me a hik. 10 Ivëh, ke eöm me, eöm se keh nok vahik kurus em pa ma tah ne Sosoenën to soe ka neöm, a, eöm se soe vamanih pan, ‘Emöm o teß kikiu varoe. A ma tah nemöm to nonok nem, eß a kiu akuk ko pemöm. Ivëh, kemöm hikta iu nem a soe vavihvih.’”

E Ieesuß To Vatoß A Havun Teß To Teß Ne A Mët Töpaß

11 E Ieesuß to suksuk nö non a hanan vëh to nö non Jerusalëm, pareß koe topnin Samëriaß me Galiliß. 12 Eß to vovos nö non pa pah vöön, ka havun teß to teß me ne a mët töpaß to nönö nö ne maß, ko sun varo avoeß e ne maß, 13 pare vaoe suntan rakah ee pe Ieesuß pan, “Ieesuß, Apuh, ururuan a möm ah.”

14 Ke Ieesuß ep raoe, pareß soe pan, “Eöm se nö ko vataare këm manuh po teß ësës heß, kee ep pan eöm to voon ko vih em.”

Kee nönö avoeß e ne ka ma sioniire vih ee ka mët töpaß hik en. 15 Ka paeh va pee ep in a sionineah to vih hah, ko hah en. Pareß pah kë suntan rakah en pa ëhnan e Sosoenën. 16 Pareß vatokon pa havin mon e Ieesuß, ko soe vavihvih ke poan. A teß pamëh eß a to Samëriaß varoe to hah maß.

17 Ke Ieesuß ep in a teß pamëh, pareß soe pan, “Eöß to koman noß pan, a havun teß to vih hah. A meh tönim me a tanaß poß harih? 18 Ahik pöß ta meh teß to hah maß pa kë a ëhnan e Sosoenën, ha? A pah teß ro va pa meh muhin to tavus vavih, to hah maß pa soe vavihvih me a kë a ëhnan e Sosoenën.” 19 Ke Ieesuß soe ke poan pan, “Eën se sun parën nö, o vaman pën to vavih hah en pën.”

A Matop Vih Pe Sosoenën Se Nö Maß

Matiu 24:23-28; 24:37-41

20 Ko Parësiß hi e Ieesuß pan, “O poen poanheh no a Matop Vih pe Sosoenën se nö maß?”

Ke Ieesuß piun raoe, pareß soe pan, “O poen no a Matop Vih pe Sosoenën se nö maß, a napan to hikta onöt ne a ep pa matëëre. 21 Eße to hikta onöt ne a soe pan, ‘Ep öm a Matop Vih ivëh, keß ivöh, suk ataeah a Matop Vih pe Sosoenën nöm to teß me e nem.’”

22 Ke Ieesuß soe ke a ma vamomhë peß pan, “Amot no o poen se tavus maß ko kokoman peöm se pah iu rakah e non pa ep a neoß e Koaß Teß Pa Napan Kurus po to pöh poen ro. Ivëhkëk, eöm to hikta se ep nem. 23 A napan se soe va ka neöm manih pan, ‘Ep öm, eß to teß no maß manuh, me ee se soe pan, eß to teß non manih.’ Ivëhkëk, eöm se sun vakis ko nat nem vatet raoe. 24 Eöm to nat e nem, o poen no a vakës se vakës maß, o ëman se tavus pa ma ö kurus manih pa akis. Ivëh, ko poen ne eöß e Koaß Teß Pa Napan Kurus se nö hah maß, eöß se nö va maß nën, ka ma napan kurus se ep a neoß. 25 Ivëhkëk, eöß se teß o kamis o pöh apuh po vamomoaan, ka napan va kuru se heß tonun a neoß me o vavaasis peöß.

26 A taateß nee to nok voh pa ö ne Noaß to teß non, eß to teß akuk va kov e non manih pa ö nee se nok vamanih peöß e Koaß Teß Pa Napan Kurus. 27 Eße to ënëën ko kaak ne, pare vavaen ne keß antoen rakah po poen ne Noaß to hop en po paröß me ra kën tom sinan peß. Ka unat apuh ip vamët en pa ma napan kurus. 28 Eß se teß va non manih po poen voh pe Löt. A napan to ënëën voh ne ko kakaak ne, ko vonvoen tah ne ko vavoen tah ne manih pa napan, pare kikiu ne a ma rak pee ko ekeok iuun ne. 29 Ivëhkëk, e Löt to këh a Södom manih po poen pamëh, ka suraß me o vös vëh o sölpaß to taneß maß manuh akis vamanih pa uhön, ko ip vahik voh en pa napan. 30 Keß teß va kov e non manih po poen ne eöß e Koaß Teß Pa Napan Kurus se tavus vateeraß hah va maß.

31 Manih po poen pamëh a pah teß se keh tok no maß tonun iuun peß, ka ma tah peß pet no maß koman iuun, a, eß to hikta onöt non a nö pa kon a ma tah peß, ko rusin këh a hat. Keß teß va kov e non manih pa teß to teß no maß pa rak peß, eß to hikta onöt non a up hah a ma tah peß manuh iuun, ko rusin këh a hat. 32 Eöm se koman nem e köövo pe Löt to vatatarih hah voh no na pa vöön Södom, ke Sosoenën ip en peß. 33 Ta pah teß se keh iu ötöön non o toßtoß peß, a, o toßtoß peß se ro amot en. Ivëhkëk, a teß se keh koman a non neoß, pareß mët suk a neoß, a, amot a teß pamëh se kon o toßtoß tamoaan. 34 Eöß to soe ka neöm, manih pa popoen pamëh a poa teß to koroh ne pa pah tevan, e Sosoenën se me a paeh këh a meh to koroh non. 35 A poa köövo se posean ne pa rih o praoaß va pa peret, e Sosoenën se me en pa paeh, ka meh neß se këh en. 36 A poa teß se keh teß ne pa rak, e Sosoenën se me a paeh këh a meh se teß non.”

37 Ko vamomhë peß pënton a soe vaßih, pare hi poë pan, “Apuh, a tah vaßih se tavus rakah nih?” Ke Ieesuß soe ke raoe pan, “Manih pa ö poanheh no a tah koa to pët non, manih pa ö pamëh no o növan ënëën tah koa to tötönun ne sih nën.” ^{▼▼ E Ieesuß to soe vapipinoß a ö no a soe peß se tavus vamaaka pa matëëra napan. Eß to teß va non manih pa taateß po növan ënëën tah mët. A ëhnëëro növan poë varih, o valjah. O növan poë varih to ënëën varoe ne sih a ma tah mët to taneo ne pa koa. A ma valjah peo to nönö ne maß marën a ëën a tah mët. O teß se keh ep a ma valjah peo to vatvi ne kin, ee to nat ee pan a tah mët to teß non nën. Eß to teß akuk va kov e non manih pa ö no a napan se ep e Ieesuß se hah vamaaka va maß, eß to hikta se vavakoaan nö non maß.}